李勤岸
(2002年 tī 波士頓228五十五週年紀念會/
2003年 tī 哈佛大學228五十六週年紀念會)
各位敬疼ê 台灣同鄉，各位兄弟姊妹：大家午安，大家好！
今仔日咱聚集tī 遮 ，抱著沈重ê 心情beh 來紀念228。我beh 用『建構台灣人ê 集體記憶』來參大家做夥三思228 ê 本質kap 意義，向望透過對228進一步ê 認捌，會當深化咱台灣人ê 族群意識kap 國家意識。
首先，我beh 來宣讀一份七人ê 名單：
陳 炘／日本慶應大學理財科畢業；美國哥倫比亞大學經濟系畢業
施江南／日本京都大學醫學博士
李瑞漢／日本中央大學法科畢業
郭章桓／日本慶應大學醫學院外科畢業
王育霖／日本東京帝國大學法科畢業
陳澄波／日本東京美術學校畢業
林茂生／日本東京帝國大學畢業；美國哥倫比亞大學教育哲學博士
以上所列，真成是teh 發布台灣政府內閣主要部會首長ê 名單。以in ê 資歷，in ê 才華，in ê 名望，會當組成一個世界一流ê 新內閣。可惜，歷史不但無hōo in去發揮in會當貢獻hōo 國家ê 專長，顛倒轉，in去hōo 一个世界無水準ê 政府無緣無故屠殺掉。尤其諷刺ê 是，當時in攏真熱誠認同彼个所謂『祖國』政府，幻想beh 回歸『祖國』ê 懷抱。In無想到脫離日本殖民，毋是『光復』，卻是再度淪陷入去另外一个帝國ê 再殖民。短短一冬四個月，228大屠殺就來發生。短短10外工時間，被屠殺死亡ê 人數，確實偌濟，到旦無人清楚。保守估計，有數萬人左右。若是根據93年美國國家地理雜誌 (National Geographic) 調查報告，大約有四萬人。
228 ê經過：
1945年8月15日日本戰敗投降，中國tī 10月17日派兵五千佔領台灣。47年月27日，中國軍事政府專賣局查緝私煙，tī台北太平町附近取締賣薰ê 寡婦林江邁，沒收所有ê 薰，koh kä伊身軀所有ê 錢攏提去，這個生活困苦ê 婦人人苦苦哀求，煞hōo人用槍頭mai kah 頭殼流血昏倒在地，旁觀ê 人看無做得，大聲喝拍，專賣局ê 人一面走一面開槍，tuānn 死路人陳文溪。群眾愈來愈憤怒，包圍警察局憲兵隊，要求交出兇手。隔工，2月28日，人民開始罷工罷課遊行示威，中國政府開機關槍掃射。事件開始擴大。後來台灣社會精英及民間領袖組成228處理委員會，一方面an-tah群眾，一方面向中國陳儀政府交涉，要求政治改革。陳儀一方面應付『處委會』，騙講bē uì 中國調兵來，一方面已經向蔣介石請求軍隊。3月初9，中國軍隊21師登陸基隆。開始大屠殺。
228 ê 本質是啥物？
228毋是一个事件，是大屠殺。
228毋是incident, 毋是一個事件，koh khah 毋是accident, 毋是意外事件。伊是歷史ê必然，無發生tī二月底，嘛會發生三月底，無發生tī彼工，嘛會發生tī別工，緊差慢，伊總是會發生。228 bë 使講是事件，bë使講是incident，伊是參人類tī世界其他所在發生ê massacre, genicide, holocaust 仝款，是massacre, 是屠殺，是genicide, 是種族屠殺，是holocaust，是集體屠殺。228 本質上是一個族群去侵略另外一個族群ê大屠殺。
本質上，對中國人來講，彼是一場戰爭。是對日抗戰ê延續。中國人tī中國hōo 日本人欺負、佔領、屠殺，in來台灣是來『接收』，台灣當時是日本ê 領土，台灣人是日本人，in是軍事佔領台灣，tī 十外工屠殺數萬人，基本上in是當做戰爭 ê 延續，是對日本人ê報仇。Tī 這場戰爭中，可惜，台灣人並無正規軍，台灣人有ê 不過是正義感、不過是不滿、不過是憤怒。台灣人誤以為家己是中國人，誠心誠意 teh 歡迎家己ê同胞，結果毋知影家己無hōo人當做中國人，無hōo人當做同胞，卻hōo人當做日本人，hōo人當做戰爭報仇ê 代罪羊羔，成做犧牲品。
Tī這場莫明奇妙ê戰爭中，台灣人犧牲性命ê 數萬人內底，有三款人。第一款是台灣人ê 菁英分子，有 ê 是議員，有ê 是智識分子，有ê 是醫生、律師，是作家、畫家，in攏tī屠殺 ê 名單內底。中國軍事政府是根據名單去掠人銃殺ê 。第二款是有真正抗戰ê ，有參戰ê 。Tī中部埔里ê 二七部隊，其實是台中商專、台中師專ê 學生 kap 維持治安ê 民間自衛隊所組成，真正參中國軍正面戰爭ê 時間干焦四工，就無法度抵擋，宣佈解散（3/12~16）。Tī高雄，高雄一中ê 學生、高雄女中ê 學生嘛是抗暴四工 (3/3-6) 就全部hōo人消滅。第三款人上濟，攏是無辜ê 百姓，tī中國軍隊登陸四界屠殺中白白喪生。
228 ê 意義？咱攏是228受難者
嚴格講起來，全体台灣人攏是228受難者。228以後，紲落來開始『清鄉』、白色恐怖，台灣人自按呢tī完全無人權、無自由ê 特務統治之下過五十幾冬，雖然性命無喪失，不過除了性命以外，喪失去 ê 物件實在太濟太濟。講起來，除了悽慘ê 228遺族以外，所有ê台灣人攏嘛會使講是 228 ê受難者。
Koh進一步講，除了有形ê軍事228以外，中國政權tī台灣所實施ê 語言政策，是屠殺台灣人所有母語 ê 另外一个228大屠殺。用屠殺語言文化來達成伊軍事228無完成ê 部分，也就是滅種。 Kā 你ê 族群母語消滅掉，就會當達到消滅整个族群，達到滅種ê 目的。台灣一向實施 ê ，到旦嘛猶未廢除ê ，就是中國語為國語ê 語言政策。這個政策最後就是beh 消滅台灣母語。前三工， 2 月21日，是世界母語日。聯合國教科文組織（UNESCO) 公布一份報告，講現此時世界上現存ê 6000 ê 語言，有一半瀕臨滅種。其中特別提著台灣，講台灣原本所有ê 23種本土語言，受著華語ê 威脅，不久 ê 將來就會攏消失，tī地球消失。按呢講，咱其實攏是228 ê 受難者，準講毋是軍事228 ê 受難者，嘛是語言228 ê受難者。咱攏是228 ê 受難者。
集體創傷需要集體治療
一個人若有創傷就需要治療，心理ê 創傷需要心理治療。228 ê創傷，是台灣人集體ê心理創傷，bë 當干焦向前看，毋轉去看彼個傷口， bē當一直kā伊deny，親像早前中國政府ê做法按呢，kā 伊否認，不準你知影伊ê 存在，知影就犯罪，就有危險。 Deny是人類對付心理創傷真容易採取ê 方法，不過，這款方法bē 當治療彼ê 創傷。另外一个態度就是 ignore，雖然無去kā伊否認掉，不過是kā 伊忽略，有當做無，這就是咱定定用來安慰家己ê ，講號做『向前看』。講『向前看』是khah好聽，其實這就是ignore ê 態度。 Ignore bē 當治療，bē 當解決問題。
今仔日咱講起228大屠殺發生ê 代誌， 毋是beh 來怨恨啥物人， 毋是無beh 原諒，是 beh 得著治療。台灣人ê 集體創傷需要集體做伙勇敢去面對，去瞭解，然後得著治療。
228是咱共同 ê集體記憶，需要咱做伙建構
咱今仔日聚集tī遮, 毋但beh 集體治療咱228 ê創傷，咱猶beh koh khah積極建構咱台灣人ê集體記憶。 228大屠殺了後，hōo 人thâi無了ê 台灣人，一方面大著驚，另外一方面煞清楚家己是台灣人， 毋是中國人，煞產生無beh 永遠hōo人殖民，產生beh 家己當家做主，beh 家己有家己 ê 國家ê 信念。這个信念是犧牲數萬人ê 性命才換來ê 。這个信念建立tī 228大屠殺頂kuân。做一个台灣人，無管你tī世界佗一角落，只要你是台灣人，當頭照面，免講話，腦內底咱這个共同ê集體記憶就會互相對話，就會真親，真疼惜對方，因為你有228 ê創傷，我有228 ê 創傷，咱有共同 ê 一个集體記憶。親像猶太人，見面就有in ê 舊約故事ê 共同記憶，koh 有in被德國人集體屠殺ê holocaust ê 共同記憶。這款ê共同記憶需要不斷去強調，用儀式，用藝術，用詩歌，用小說、用電影不斷去講起，不斷去紀念。 毋是beh 怨恨， 毋是無beh 原諒，是beh 進一步hōo咱台灣人有共同ê 記憶，會當形成咱台灣人共同一致ê 性命意識 kap 國家意識。勇敢做伙防止任何形式ê 228 tī台灣koh 再發生。記憶是一个族群通向救贖 ê 不二法門；若是放hōo bē記得，最後ê結果就是是自我放逐，就是自暴自棄ê 絕望。今仔日咱tī遮紀念228 ，我用『建構台灣人ê集體記憶』來參大家做伙勉勵。多謝各位。