李勤岸◎哈佛大學東亞語言文明系台灣語言教授
我 ti 四十歲 ê 時才開始產生語言意識，開始有文化覺醒。我決志 beh 將後半世人奉獻 ti 台灣人 ê 語言復興運動。台灣人 ê 語言運動最大 ê 困境是 ti 有語言學專業訓練 ê 人 siu° 過少。因為專業素養無夠，致使參與運動 ê 人熱心有 chhun，運動 ê 方向卻無真清楚，當然成就 tioh 足有限。大家相爭發明標記符號，逐個比賽個人 ê cheng-chông，一仙比一仙 khah gâu，可惜整個運動無真大 ê 進展。台灣語文運動上大 ê 問題可能 m 是無 gâu-人，顛倒可能是 gâu-人 siu° 濟。Ti 這個認識之下，我感覺我需要有謙卑 ê 心，ùi 充實上基礎 ê 語言學知識開始。我真清楚台灣語文運動是一個長期 ê 運動，我就決志 beh 攻讀語言學博士，用 che 做我參與台灣語文運動 ê 第一步。
我用五冬 ê 時間修課，用 beh 夠四冬 ê 時間寫博士論文。我 ê 論文無 beh 寫 siu° 過頭學術理論，希望寫 ti 學術 kap 應用之間，ho 一般對台灣話有興趣，有心 beh 真正了解台灣話 ê 人會-tàng 讀有，koh 有學術 ê 根據，通成做語文運動 ê 基礎。按呢咱 ê 運動 khah be khok-khok chông，be 輸痟狗 the 鑽墓壙。
語言當然 m 是 kan-ta° 溝通 ê 工具 nia-tia°。語言猶 koh 有族群 ê 文化 kap 感情無可能分離 ê 成分 (cultral and sentimental attachment)。Chit 內底牽連真濟語言政治 (linguistic politics) ê 成分。語言政治是語言運動真要緊 ê 一部份，咱需要用心思去了解，be-tàng 以無常識 ê 態度去對待。
1991年我開始進入語言學研究 ê 領域，用接近十冬 ê 時間，ti 語言所 ê 應用語言學 kap 理論語言學內底學習，完成我 ê 語言學博士學位。Ti 這本冊內底我希望用淺顯 ê 文字 ka 學術 ê 理論化做一般人會-tàng 了解 ê 文章，來提供台灣人對語言 ê 進一步 ê 常識。
這就是我1994年開始寫「語言學筆記」ê 動機。
我服膺 Hawai‘i 語言運動所提出 ê 口號：凡是殖民語英語做會到 ê，阮 Hawai‘i 話攏做會到。仝款道理，凡是殖民語華語做會到 ê，台灣話絕對攏做會到。華語會-tàng 寫社論，當然台灣話 ma 會-tàng 寫社論。Ti 我負責美國台灣公論報社論 ê 期間，我就邀請台語文運動 ê 有志開始來寫台語文社論，我個人 ma 參與寫作。雖然當時遇著真濟阻力 kap 反對，無管按怎，阮已經證明台語文有能力寫社論。收 ti 這本冊輯二內底 ê 作品，攏是當時我 ti 公論報寫 ê 社論。雖然時空已經有真大 ê 變化，不過讀者若是會-tàng khia ti 彼當時 ê 時代背景來讀，一定會-tàng 體會出當時我對台灣時局期待台灣人出頭天 ê 迫切心境。這是語言運動直接參與 ti 政治改革 ê 一步。
華語文會-tàng 寫學術論文，台語文當然 ma 會-tàng。收 ti 第一輯 ê 二篇語言政策論文就是一個實踐。目前教育部國語推行委員會 teh 推-sak 制訂現此時台灣所有 ê 十四種語言成做國家語言，這抑是我彼篇 「語言政策及台灣獨立」內底 ê 論點。這不過是上基本 ê 語言平等 ê 觀點，反對 ê 人無 beh 分清楚官方語言 kap 國家語言 ê 區別，開嘴合嘴不可行，實際上是無願意放棄華語獨尊 ê 既得利益。語言權若 be-tàng 平等，講甚麼族群平等攏是取一支嘴 (lip service) 而已。可行不可行是制訂「官方語言」ê 層次。Ti 這個層次，我猶是認為 ti 多語社會，印度獨立當時 ê 三語公式政策真值得參考。Ti 多語社會，需要多語 ê 語言政策，無語言政策雖然比惡質 ê 單語獨尊 khah 民主，但是放牛食草是無負責任 ê 態度，制訂多語 ê 語言政策，撥出國家預算來做保護弱勢語言，實施母語教育是多語社會負責任、有遠見 ê 政府應當做 ê，無管台灣抑是美國攏真需要這款政府。
我 ê 論文有華語版、有客語版；我 ma 有華語版 ê 社論 kap 評論，這 ma 是我對多語社會理想 ê 一個實踐。咱應該開始 ho 台灣成做一個慣勢翻譯、無驚麻煩、有包容心、會-tàng 互相欣賞、互相學習語言、文化 ê 一個進步國家。